ഷിബു മുഹമ്മദ് ഉടലുകള്‍ പാടുമ്പോള്‍, ടെലിവിഷന്‍: ചരിത്രവും രാഷ്ട്രീയവും, ചരിത്രത്തിന്‍റെ മുദ്രണങ്ങള്‍, മുഖ്യധാരയുടെ അതിരുകള്‍, കാഴ്ചയുടെ വര്‍ത്തമാനം എന്നീ പുസ്തകങ്ങളുടെ കര്‍ത്താവ്. മലയാളത്തിലെ ആനുകാലികങ്ങളില്‍ സ്കാരിക വിമര്‍ശനപരമായ ലേഖനങ്ങള്‍ എഴുതിവരുന്നു. ദേശാഭിമാനി വാരികയില്‍ ചീഫ് സബ്എഡിറ്റര്‍. കോഴിക്കോട് നഗരത്തില്‍ താമസിക്കുന്നു.
ചലച്ചിത്രകലയിലെ സുപ്രധാനമായ ഒരു ആവിഷ്കാര ഉപാധിയാണ് ക്ലോസ് അപ്പ് ( closeup) അഥവാ സമീപദൃശ്യം. സമീപസ്ഥമായ ചിത്രീകരണം വഴി വിശാലവും സവിസ്തരവുമായ കാഴ്ച ലഭ്യമാക്കുകയാണ് ക്ലോസ് അപ്പ് ഷോട്ടുകള്‍ ചെയ്യുന്നത്. ആവിഷ്കാരത്തിന്‍റെ ഫലപ്രാപ്തിക്കായി പശ്ചാത്തലത്തില്‍ വരുന്ന ഏതൊന്നിനെയും ക്ലോസ് അപ്പുകള്‍കൊണ്ട് ചിത്രീകരിക്കാമെന്നിരിക്കിലും പൊതുവെ കഥാപാത്രങ്ങളുടെ മുഖങ്ങളാണ് സമീപദൃശ്യങ്ങളായി ചലച്ചിത്രങ്ങളില്‍ കടന്നുവരാറുള്ളത്.
