Project Description

ஒளியெழுத்து புகைப்படமும் கவிதையும்

Trap © Abul Kalam Azad 1995

விடுதலை

லேசான அதிமுதியவள்
அனாதைச் சவமானாள்.
மொட்டைப்பாடைக் கட்டி
சுடுகாட்டில் தூக்கிப்போட்டனர்.
துணைப்பிணமாய் போனது
காயிதக்குறிப்புகள் மட்டுமே.
மையிரவில்
அடிக்கி ஒடுங்கிப் படுக்காத விறைசவத்தை
நற்போதையில் வேலியில் எறிந்துவிட்டு
எடுத்துவைத்தக் காயிதத்தில்
தள்ளாடும் எழுத்துகளை
வாசிக்கத் தொடங்கினார் தோட்டி.
‘உழுதுட்டு வந்தவள
ஒட்டுத்துணியில வச்சு
பதம் பார்த்தான்…
உழுதுட்டு வந்தவள
ஒட்டுத்துணியில வச்சு
பதம் பார்த்தான்…
உழுதுட்டு வந்தவள
ஒட்டுத்துணியில வச்சு
பதம் பார்த்தான்…’ என்பதே
அனைத்திலும் எழுதியிருந்தது.
வேலியில் கதம்பமாகத் தொங்கியவளை
புதுத்தீக்குள் முக்கி
மெது சாம்பலாக்கி
காற்றிடம் ஒப்படைத்தார்.

தமிழ்  ஒளியெழுத்து

சமகால புகைப்படமும் கவிதையும் சிறப்பு நெடுவரிசை. கவிதைகள் முத்துராசா குமார். 30 டிசம்பர் 2020 அன்று வெளியிடப்பட்டது. வெளியிடப்பட்ட படங்கள் மற்றும் நூல்கள் ஆசிரியர் மற்றும் / அல்லது ஃபோட்டோமெயிலின் பதிப்புரிமைக்கு உட்பட்டவை.

அபுல் கலாம் ஆசாத், சமகால இந்திய புகைப்படக்காரர் மற்றும் புகைப்படங்களுக்கான ஏகலோகம் புகைப்படக்கலை அறக்கட்டளையின் நிறுவனர். அபுலின் புகைப்படப் படைப்புகள் பெரும்பாலும் சுயசரிதை மற்றும் அரசியல், கலாச்சாரம், சமகால நுண்ணிய வரலாறு, பாலினம் மற்றும் சிற்றின்பம் ஆகிய பகுதிகளை ஆராய்கின்றன. அவரது படைப்புகள் சாதாரண மக்கள் இல்லாத வரலாறு மற்றும் முக்கியமாக அழகான படங்கள் மற்றும் சின்னங்களால் வழங்கப்படுகிற சமகால இந்திய வரலாற்றை மற்றொரு பரிணாமத்தில் எடுத்துரைக்க முயற்சிக்கின்றன.

முத்துராசா குமார், மதுரை மாவட்டம் சோழவந்தான் – தென்கரை சொந்த ஊர். மதுரை அமெரிக்கன் கல்லூரியில் இளங்கலை, சென்னைப் பல்கலைக்கழகம் இதழியல் & தொடர்பியல் துறையில் M.A.Mphil பயின்றுள்ளார். ஆனந்தவிகடனில் மாணவப் பத்திரிகையாளரகப் பணிபுரிந்துள்ளார். முத்துராசா குமாரின் கட்டுரைகளில் சில ஆங்கிலத்திலும், மலையாளத்திலும் மொழிபெயர்க்கப்பட்டு The Wire, The News Minute, Malayala Manorama முதலான செய்தித்தளங்களில் வெளிவந்திருக்கின்றன. ஊடகத்துறையில் வழங்கப்படும் ‘LAADLI’ விருது இவரது கட்டுரைக்காக வழங்கப்பட்டிருக்கிறது.’செதில் பய’ ‘டிஜிட்டல் மூஞ்சி’ போன்ற சுயாதீன இசை ஆல்பங்களை எழுதி இயக்கியுள்ளார். அச்சு மற்றும் இணைய இதழ்களில் கட்டுரைகளும், கவிதைகளும், சிறுகதைகளும் எழுதி வருகிறார். தற்போது சுயாதீனப் பத்திரிகையாளராகவும், திரைத்துறையிலும் இயங்கி வருகிறார்.